Рамазан – олы куаныч ае

Бисмилләһир рахмәнир рахим!

Рамазан – олы куаныч ае. Ләкин быел беренче тапкыр аны авыр шартларда үткәрдек. Илебезгә, бөтен дөньяга зур бәла килде. Шуңа күрә мәчетләребездә тәравих, җомга намазларын укый алмадык.

Кызганычка каршы, катлаулы хәл әле дә бетмәде. Илебез яңа чир белән көрәшү өчен бик күп эш алып бара. Шуңа күрә быел Гает намазын җәмәгатьне җыймый гына, имамнар, мәчеттә хезмәт итүчеләр белән генә үткәрәбез.

"Беренче канал" буенча бөтен илгә, БСТ каналы буенча тоташ республикага Гает намазы күрсәтеләчәк. Барыгыз да Ураза бәйрәмен өйләрегездә каршылап, телевизор аша гомум Гает намазына кушылыгыз. Авырулар үтеп, киләчәктә изге Рамазаннарыбызны шатлык-куанычта, бердәмлектә генә каршыларга насыйп булсын!