КАР ДЕСАНТЫ ЭШКӘ ЧЫГА

Кыш һәрчак төрле була, ел елга туры килми, диләр. Әмма явым-төшем һәм җил елның әлеге чорында тотрыклы булып кала бирә. Чокырларга, урман буйларына кар сала, басу-кырларны һәм торак пунктларны ак юрган белән каплый.

Авылларда юллар киң түгел, аларны чистарту өчен габаритлары зур булмаган техника кирәк. 2019 елда Первомайский авыл биләмәсендә нәкъ менә шундыйны сатып алдылар. Авыл биләмәсе башлыгы М.Г.Макаренко әйтүенчә, җиһазлы тәгәрмәчле трактор авыл Советы хуҗалыгында Урындагы инициативаларны хуплау программасында катнашу аркасында барлыкка килгән. Торак-коммуналь хуҗалык министрлыгы линиясе буенча шул ук елны тагын бер “МТЗ-82” тракторы сатып алынган, ә аңа җиһазларны – көрәк һәм роторлы чапкычны – авыл Советы үз акчасына сатып алган.

Быелгы карлы кышта бу ике трактор киеренке эшли, урамнарны, производство объектларына, мәдәният һәм мәгариф учреждениеләренә керү юлларын чистарта. Торак пунктлар арасында Юл төзү-ремонтлау идарәсе техникасы эшли.

– Быел бик рәхәт, - дип сөенә Владимировка авылында яшәүчеләр, – капкадан чыгасың, һәм менә синең алдыңда чиста, тигез юл. Аның буенча йөрүе дә күңелле, элекке ише түгел: кирәк урынга билдән карга чумып, шуышып диярлек барып җитә идек.

Безнең авыл биләмәсенең барлык 12 торак пунктында яшәүчеләрнең күбесе шундый фикердә, ә бу исә йөз километрга якын юл, өстәвенә, балалар бакчалары, мәктәпләр, кибетләр, ФАП, клублар янындагы территорияләр. Бер сүз белән әйткәндә, кар чистарту техникасына эш җитәрлек, ә әлеге кар һәм бураннар вакытында тракторчылар Александр Пальчик һәм Рәфис Хуҗиәхмәтов өчен бу инде супергеройлар программасы!

Шунысын да әйтергә кирәк, ир-егетләр үз бурычын бик яхшы үти. Көн саен аларның кар десанты көртләргә каршы көрәшкә чыга, эш көне сәгать иртәнге 6дан башлана. Эшкә тотыныр алдыннан тәгәрмәчләрне, шиннардагы басымны тикшерергә, май кимәлен карарга, пыялаларны боздан чистартырга кирәклеген исәпкә алсак, чираттагы наряд-биремне үтәү өчен тагын да иртәрәк торырга кирәк. Ә эш көне кайчагында төнгә җитәрәк кенә тәмамлана.

Синоптиклар фаразлавынча, кар, җил, салкыннар бездә март ахырынача диярлек булачак, шуңа күрә тракторчыларыбызга якын киләчәктә эшсезлек янамый. Хәер, Рәфис белән Александр кайчан да үзләренә шөгыль таба – юлларны кардан чистарту таләп ителмәгәндә алар үзләренең “тимер атларына” техник хезмәтләндерү үткәрә, эретеп ябыштыру, слесарь эшләрен башкара, җәен юл кырыйларын чаба, территорияләрдән чүп-чарны ташый.

Намуслы һәм шундый кирәкле хезмәтләре, авылларыбызны төзекләндерү хакына эшләп һәркайсы туган ягыбызга карата югары җаваплылык һәм мәхәббәт үрнәге күрсәткәне өчен Первомайский авыл биләмәсе халкы исеменнән аларга рәхмәт белдерәм.