Саклаучылар турында кайгыртып

Туган илне саклаучылар өчен медицина ярдәме аеруча мөһим. Стәрлетамакта “МедТранс” медицина үзәге СВО зонасыннан әйләнеп кайткан яки ялга кайткан хәрби хезмәткәрләрне, шулай ук аларның авыр тормыш хәлендә калган якыннарын бушлай кабул итә.

Биредә тикшеренү һәм дәвалану узарга: УЗИ үтәргә, массаж курсы, инфузион дәвалау узарга, көндезге стационарда ярдәм алырга була. Төрле профильле белгечләр – кардиолог, терапевт, педиатр, невролог, нейрохирург, эндокринолог, хирург-ортопед, травматолог һәм стоматолог кабул итә. Шуңа күрә күп кенә мәсьәләләрне бер урында хәл итәргә мөмкин.
Хәрбиләр хезмәт иткәндә алган җәрәхәтләр сөземтәләре белән дә, хезмәт иткән вакытта игътибар бирмәгән башка сәламәтлек проблемалары белән дә мөрәҗәгать итә.
Кайчак башка сәбәп белән дә киләләр. Бервакыт “МедТранс”ка улын югалткан ханым мөрәҗәгать иткән. Кайгысыннан ул сөйләшә дә, елый да алмаган, әйтерсең, үз-үзенә бикләнгән һәм гадәти тормышка әйләнеп кайта алмаган. Монда аңа бу авыр чорны кичерергә, тынычланырга һәм яшәү өчен көч табарга ярдәм иткәннәр. Соңрак ханым үзәккә рәхмәт сүзләре язган.

Медицина үзәгенең баш табибы Вәсимә Мәһәдиева хәрбиләр язмышы турында ишетеп кенә белми. Аның улы – хәрби хәрәкәтләр ветераны, Курскта хезмәт иткән. Ул анда киткәч, әни кеше бик нык хафаланган.
- Мин үземә урын таба алмадым, еладым. Хәтта ярдәм күрсәтә алмадым, - дип искә ала Вәсимә Мәһәдиева.
Ул улы янына барган һәм якын кешеләре еракта булганда һәм элемтә чикләнгәндә гаиләләрнең ниләр кичергәнен яхшы аңлый.
Бүген баш табиб хәрбиләргә медицина үзәгеннән тыш та ярдәм итәргә тырыша. Ул беренче ярдәм кирәк-яраклары белән аптечкалар җыя һәм аларны СВО зонасына сугышчыларга җибәрә.

Аның өчен бу һөнәри бурыч кына түгел, ә хәзерге вакытта алгы сызыкта булган кешеләр өчен мөмкин булганның барын да эшләү теләге дә.
Үзәк пациентлары арасында Загородный авылыннан гаилә бар. Гаилә башлыгы, “Сәлам” позывнойлы хәрби хезмәткәр махсус хәрби операция зонасында хезмәт итә. Дүрт ел элек ул чакыру кәгазе алган һәм хәрби бурычын үтәргә киткән. Хезмәт иткән вакытта яугир генерал Шәйморатов һәм “Батырлык өчен” медальләре белән бүләкләнгән.
Чираттагы тапкыр ялга кайтканда ул көндезге стационарда дәвалану узарга уйлаган. Ир кеше невролог һәм кардиологтан консультацияләр алган.

- Персоналның ярдәмчеллеге, шулай ук сыйфатлы дәвалаулары ошады, - дип билгели ул.
Ире хезмәттә чакта йорт һәм балалары өчен җаваплылык тормыш иптәше Елена иңендә. Алар ике бала – 11 яшьлек улларын һәм 9 яшьлек кызларын тәрбияли.
Бу дүрт ел хатын өчен җиңел булмаган.

- Ул киткәч, мин бер айда тугыз килограммга ябыктым. Рухи яктан бик авыр булды, һәрчак хафаландым, бигрәк тә элемтә булмаганда. Барыннан да ныграк билгесезлек куркыта, - ди Елена.
“МедТранс” пациентларының тарихлары төрле. Кемдер җәрәхәт алганнан соң килә, кемдер кичектереп килгән проблеманы хәл итәргә тырыша, ә кемгәдер авыр хәсрәттән соң ярдәм таләп ителә. Биредә хәрбиләрне дә, аларның якыннарын да кабул итәләр, һәм һәркемгә ярдәм күрсәтергә тырышалар.

Е. ИШМӨХӘММӘТОВА.
Г. БИКМӘТОВ фотосы.