Ярдәм һәм перспективалар турында диалог

Стәрлетамак районында Укытучылар көнен бәйрәм итү кысаларында муниципалитет башлыгы Рита Сәмигуллина яшь педагоглар белән очрашты.

Бу – педагогик стажлары бер елдан артмаган, әмма район мәктәпләре коллективларына уңышлы кушылган укытучылар. Алар арасында: башлангыч сыйныфлар укытучысы Екатерина Бурлет һәм тарих һәм җәмгыять белеме укытучысы Әбүзәр Дәүләткилдин – икесе дә Наумовка авылының Г.И.Басманов исемендәге мәктәбен тәкъдим итә; Бельский авылы мәктәбе тарих һәм җәмгыять белеме укытучысы Софья Белоус; тәрбия буенча директор киңәшчесе Камилә Солтанморатова, рус теле һәм әдәбияты укытучысы Дарья Семина, тарих укытучысы Кристина Каширина – Яңа Отрадовка авылы А.В.Трошин исемендәге мәктәбе; Ишпарсово авылы А.С.Евстигнеев исемендәге мәктәбенең рус теле һәм әдәбияты укытучысы Оксана Носова; Олы Куганак авылы Л.В.Дема исемендәге мәктәбенең башлангыч сыйныфлар укытучысы Александра Симакова. Шулай ук чарада Башкортстан Республикасы Дәүләт Җыелышы – Корылтай депутатлары Фәрит Гомәров һәм Шамил Тимербулатов катнашты.

Очрашуны ачып, Рита Мәдәриковна яшь педагогларны районның киләчәге, аның интеллектуаль потенциалы дип атады. Ул укытучы һөнәренең иң мөһим һәм иң җаваплы һөнәрләрнең берсе булуын ассызыклады. Чөнки педагог белем биреп кенә калмый, ә шәхесне дә формалаштыра, гражданнарны тәрбияли.

- Эшли генә башлаган еллар иң авыры. Безнең бурыч – сез коллегаларыгыз һәм дәүләт ярдәмен тойсын өчен барын да эшләү. Бүген сезне котлаудан тыш, нинди авырлыкларга очравыгыз, нинди сорауларыгыз барлыгы турында да ишетәсем килә, - диде район башлыгы.

Укытучы – балалар өчен остаз, дус һәм үрнәк булуын билгеләде БР Дәүләт Җыелышы депутаты Фәрит Гомәров. Ул яшь белгечләргә аларның хезмәтләрен күрүләрен, югары бәяләүләрен һәм республикада яшь педагогларга ярдәм итү программалары эшләвен әйтте.

“Тәүге адымнар: уңыш тарихлары” дип аталган сөйләшү очрашуның аерым бер өлеше булды. Яшь укытучылар беренче педагогик тәҗрибәләре белән уртаклашты – тәүге дәрестә дулкынлануларын ничек җиңүләре, 9 нчы сыйныф укучылары белән ничек уртак тел табулары, остазларының ничек үз көчләренә ышанырга ярдәм итүе турында сөйләде. Арытабан аралашу “ирекле микрофон” форматында дәвам итте. Очрашуда педагогик проектларны хуплау, остазлар, тәүге кыенлыклар һәм ун елдан районда белем бирү нинди булачагы турында сораулар яңгырады.

Сорауларга җавап биреп. Рита Сәмигуллина районның кадрлар резервы – ул актив һәм инициативалы кешеләр өчен ачык мәйданчык булуы турында сөйләде.

- Үзеңне күрсәтергә: һөнәри осталык конкурсларында катнашырга, балалар белән эшләүдә нәтиҗәләр күрсәтергә, методик берләшмәләрдә чыгыш ясарга кирәк. Мәгариф бүлегенә мөрәҗәгать итәргә була, анда нинди документлар кирәк һәм гаризаны ничек тапшырырга – барын да аңлатачаклар.

Очрашу чәй табыны артында җылы һәм ихлас атмосферада үтте. Яшь педагоглар үзләрен борчыган сорауларга җаваплар алды, иң мөһиме – хезмәтләрен күрүләренә, хөрмәт итүләренә һәм ярдәм итәргә әзер булуларына инандылар.

А. САРЫ.

Р. ЦУКУР фотолары.