ҮРЛӘР КӨЧ ТҮГЕП ЯУЛАНА

Хәбибуллин Мөбәрәкша Сәфиулла улы 1917 елның 23 апрелендә Талач авылында, ишле крестьян гаиләсендә дөньяга килгән. Соңрак гаилә икенче районга күченеп китә.

Бик яшьли эшли башлый. Әле үсмер чагында ук җәмәгать көтүе көткән, аннан ат караучы булып эшләгән. Соңрак, 18 яшьлек егет булгач, ул чакта әле Стәрлетамак районына караган Ишембай касабасындагы атлар базасына урнаша. 1937 елда ул нефть промыселына җир асты скважиналарын ремонтлаучы булып эшкә керә. Хезмәт сөючәнлеге аңа кыска гына вакыт эчендә эшне үзләштерү мөмкинлеге бирә. Ә бер елдан соң аны Кызыл Армия сафларына алалар.

1940 елда демобилизацияләнгәннән соң М.С.Хәбибуллин Ишембайга нефть промыселларына кайта. Шул вакыттан башлап, аның хезмәт биографиясе нефть тармагына бәйле була. Биредә ул Бөек Ватан сугышы елларында да эшләвен дәвам итә. «Ишембайнефть» трестының комплекслы бригадасының ачкыччысы, мастеры, җир асты ремонты операторы була. 1960 елдан «Аксаковнефть» нефть промыслы идарәсендә (Бәләбәй шәһәре) җир асты скважиналарын ремонтлау операторы булып эшли.

М.С. Хәбибуллин бригадасы скважиналарга сыйфатлы ремонт үткәреп, елдан-ел югары производство күрсәткечләренә ирешә. Мөбәрәкша Сәфиулла улы скважиналарны вышкасыз эксплуатацияләү технологияләрен кертү инициаторы булып тора. Үзенең эш тәҗрибәсе белән ул башкалар белән бик теләп уртаклаша, күп кенә яшь белгечләр өчен яхшы остаз була.

Җир асты скважиналарын ремонтлауда Хәбибуллин вахтасы беренчеләрдән булып күчмә агрегатларны үзләштерә. Мөбәрәкша Сәфиулла улы катнашлыгында тирән электр насослары өчен агызучы җайланма конструкциясе эшләнә, ул аеруча катлаулы очракларда торбаларны күтәрмичә ремонт ясарга мөмкинлек бирә.

Нефть чыгару буенча җидееллык планны үтәгәндәге һәм эштә югары техник-икътисадый күрсәткечләргә ирешүдәге казанышлары өчен СССР Югары Советы Президиумының 1966 елның 23 маендагы Указы нигезендә М.С. Хәбибуллинга Ленин ордены һәм «Урак һәм Чүкеч» алтын медале белән Социалистик Хезмәт Герое исеме бирелә. Аның тырыш хезмәте медальләр, БАССР Югары Советы Президиумының Мактау грамотасы белән билгеләнә.

70 нче еллар азагыннан Мөбәрәкша Сәфиулла улы «Башнефть» производство берләшмәсенең Бәләбәй бораулау эшләре идарәсендә такелажчы булып эшли. Лаеклы ялга ул 1984 елда китә. Бәләбәй шәһәрендә яши. Нефть тармагының Социалистик Хезмәт Герое 1997 елның көзендә, 80 яшендә вафат була.

Ачык чыганаклардагы материаллар

буенча Г.ТИМЕРБАЕВА.

әзерләде.