ТОРМЫШЫ – ХЕЗМӘТ БАТЫРЛЫГЫ

Стәрлетамак районы тарихына чын хезмәтчәннәр керткән өлеш зур. Намуслы һәм фидакарь хезмәт, производство өчен бар күңелеңне бирү – бу лаеклы үрнәк.

Рәшит Шәйдулла улы Рәхмәтуллин 1939 елның 9 ноябрендә Латыйп авылында зур крестьян гаиләсендә дүртенче бала булып дөньяга килә. Әтисе 1943 елда фронтта һәлак була, шуңа күрә әниләре балаларын ялгызы үстерә. Рәшит бала чагыннан ук җиңел булмаган хезмәткә күнегеп үсә - моңа сугыш еллары һәм сугыштан соңгы чор мәҗбүр итә. Алга авылында сигезьеллык мәктәпне тәмамлаганнан соң ул Первомайский һөнәрчелек училищесында механизаторлыкка укый. 1955 елда хезмәт эшчәнлеген башлап җибәрә.

1958 елдан алып 2000 елга кадәр Р.Ш.Рәхмәтуллин Жданов исемендәге колхозда механизатор булып эшли. Йөкләтелгән эшкә, вакыты һәм куелган бурычның катлаулыгы белән исәпләшми, һәрвакыт җаваплы карый, шуңа күрә хезмәттәшләре арасында һәм җитәкчелектә ихтирам белән файдалана.

Эшенә намуслы караганы өчен Р.Ш.Рәхмәтуллин Хезмәт Кызыл Байрак, II һәм III дәрәҗә Хезмәт Даны орденнары, медальләр белән бүләкләнә, СССР Халык хуҗалыгы казанышлары күргәзмәсендә катнаша.

Хезмәт кешесе, ярдәмчел, изгелекле, җаваплы. Хәстәрлекле гаилә башлыгы, яраткан әти һәм тормыш иптәше. Туганнары һәм якыннары хәтерендә Рәшит Шәйдулла улы шулай саклана.

Армиядә хезмәт иткәннән соң ефрейтор Р.Ш.Рәхмәтуллин туган авылына кайта. Шул вакытта булачак тормыш юлдашы белән таныша да инде.

“Ул бик яхшы кеше иде. Без әйбәт яшәдек, бер-беребезнең кадерен белдек, ихтирам иттек. Кайгыртучан, игътибарлы иде”, – дип искә ала аны хатыны Рәмилә Гафият кызы.

Бәхетле гаиләдә дүрт бала туа – Радик, Гөлнара, Рөстәм һәм Раил. Өлкән уллары әтисе эзеннән китә - шулай ук колхозда хезмәт сала. Авыл тормышына һәм җир эшенә мәхәббәтне үзенең лаеклы үрнәге белән балаларында әтиләре тәрбияли.

“Басуга иртә таңнан чыгып китә иде. Әтием янында комбайнда биш ел штурвальщик булып эшләдем. Миңа кадәр абыем эшләде, ул армиягә киткәч, минем чират җитте, ә аннары – энеләремнең. Ул вакытта Латыйп авылында күп кенә кызлар һәм малайлар әтиләре янында комбайннарда эшли иде”, - дип сөйли кызы Гөлнара.

Рәшит Шәйдулла улы тормыш сөючән, энергияле, иҗади кеше була. Гармунда бик матур уйный, туган татар телендә җырлый.

“Әти кырыс булмады, әмма аның ачулы булу-булмавын күз карашыннан аңлый идек. Безне ул бервакытта да узындырмады, әмма чиксез яратты”, - дип искә ала аерым җылылык белән Гөлнара Рәшит кызы.

2000 елда Р.Ш.Рәхмәтуллинга Стәрлетамак районының почетлы гражданины исеме бирелде. Аның ише кешеләрнең язмышы – район тарихында мөһим урын тота, лаеклы һәм бәхетле гомер үрнәге булып тора.

Н.СТУКАЛОВА.