БОЗЛЫ ТӘЛГӘШ...

Бозлы тәлгәш

Сабыр гына балланганын
тәкъдиремнең көткән мәлем.
Учларымда – бозлы тәлгәш,
чугы саен минем хәлем.
Аксыл-кызыл төймә бии,
әйтерсең лә, чыжлый таба.
Кар астында торып кал да,
балланмыйча түзеп кара.
Өзеп каптым энҗе күзне,
өтеп алды бөрештереп.
Ачы балан яшен сөртәм,
тыным белән җылы өреп.
Сабырлыкның чиге таныш,
агачында сула җимеш.
Баллы булып туу кирәк,
бәхет килсен өчен элек.
* * *

Сынау

Төннең каралыгы берни түгел,
Күңел каралыгы куркыныч.
Рухын кояш иткән күзсезләр бар,
Әйтәләр күк, зинһар, бул тыныч.
Ике аяклылар сыгыла җирдә
Тормыш авырлыгын җиңәлмый.
Ике кулда йөргән дустым яши,
Дөнья йөген тарта сыкранмый.
Байлар яши җиткералмый малын,
Комсызланып җыя туялмый.
Очын-очка ялгап баручылар
Ярдәм итә һәрчак, кызганмый.
Менә шулай сыналабыз көн дә,
Яхшы белән яман – үлчәүдә.
Кеше булып кала алсак иде,
Гомер чикләреннән үткәндә.

15.11.2019

* * *