Киң күңелле, хезмәт сөючән кеше

Ул 1941 елда туган. Балачагы дәһшәтле сугыш елларына һәм сугыштан соңгы чорга туры килгән. Күп кенә яшьтәшләре кебек үк, ул ун яшеннән Кантюковка авылында совхоз бүлекчәсе басуларында өлкәннәргә ярдәмләшә башлаган.
Бүген Вилсур Мөхтәр улы шул елларны җылылык белән искә ала. Ябык, кечкенә малайларны сабан артына куйганнары, яшелчә культураларына сибү өчен чиләкләп су ташыганнарын искә ала. Олысы-кечесе – барысы да эшләгән.

- Ул вакытта бик тату яшәдек, бер-беребезгә ярдәмләшеп тордык, барысы да эшләде, бер зур гаилә булып яшәдек, - дип искә ала юбиляр.
1958 елда Вилсур Мөхтәр улы водитель таныклыгы алган. Шул вакыттан аның техника һәм авыл хуҗалыгы белән аерылгысыз бәйләнгән зур хезмәт юлы башланган.
19 яшендә Аллагуат авылында К.Маркс исемендәге колхозда 3 нче класс водитель булып эшли башлаган. “ГАЗ-51” автомобиле руле артында яшь водитель төрле эш башкарган. Аны кайда гына җибәрмәгәннәр, нәрсә генә ташымаган ул! Эше җиңел булмаган, ныклык, җаваплылык һәм техниканы яхшы белүне таләп иткән.
Вилсур Мөхтәр улы эшенә бар күңелен биргән, мөгаен, шуңадыр да берничә елдан 1 класс водитель таныклыгына ия булган. 
Аның хезмәт биографиясе – ул меңләгән километр юллар, иртә белән торып ерак сәфәргә чыгулар, йөк һәм кушылган эш өчен җаваплылык. Белоруссия, Украина, Бөрҗән районы, Бәләбәй, Уфа – безнең героебыз булган урыннарның бер өлеше генә әле бу. Ул агач, нәселле терлек, элиталы орлык һәм хуҗалыкка кирәкле башка әйберләр ташыган.
Эшләгән дәвердә аңа төрле техника – “ГАЗ-51”, “ГАЗ-53”, “ЗИЛ”, “Волга”, шулай ук “ДТ-150” тракторы белән идарә итәргә туры килгән. 1975 елда Вилсур Мөхтәр улы Башкорт АССРы Баймак районы Советы башкарма комитеты авыл хуҗалыгы идарәсеннән 1 класс тракторчы-машинист таныклыгы алган.
Ә кайсы машина барыннан да ныграк ошый иде, дигән сорауга ул, уйлап та тормыйча: “ЗИЛ” белән “Волга”дан яхшырак берни юк”, - дип җавап бирде.
Вилсур Мөхтәр улының күпьеллык намуслы хезмәте игътибардан читтә калмаган. Ул тугызынчы, унынчы һәм унберенче бишьеллыклар социалистик ярышлары җиңүчесе булган.
Югары производство күрсәткечләренә ирешкән өчен һәм эшкә җаваплы караганы өчен дәүләт һәм ведомство бүләкләренә лаек булган. Социалистик ярышларда катнашкан өчен җәмгысы 15 значок һәм өч медаль алган.

 “СССР халык хуҗалыгын үстерүдә ирешкән уңышлар өчен” ул ике тапкыр СССР Халык хуҗалыгы казанышлары күргәзмәсенең Баш комитеты бронза медальләре белән бүләкләнгән. Наградалары арасында Октябрь Революциясе ордены да бар.
Күпсанлы орден-медальләрен карап, ихтыярсыздан 44 ел намуслы хезмәт куйган кеше белән сокланасың. Ләкин Вилсур Мөхтәр улы бу хакта бик тыйнак кына әйтә: “Мин орденнар һәм медальләр өчен эшләмәдем, бу инде бер уңайдан булды”.
2001 елда хаклы ялга чыккач, Вилсур Мөхтәр улы тагын ике ел Стәрлетамак совхоз-техникумында эшләгән. Аннан соң инде хезмәт биографиясен тулысынча төгәлләгән.
Үз язмышын – хезмәт сөючән, уңган кыз Мәдинә Әбделхак кызы Ханмурзинаны Вилсур Мөхтәр улы 1964 елның июлендә очраткан. Тиздән алар гаилә корган. 1965 елда кызлары Раушания, ә 1968 елда Рәйсә дөньяга килгән.

Хаклы ялга чыккач та гаилә пары эшсез утырмаган. Алар инде үз хуҗалыкларында эшләүләрен дәвам иткән: сыерлар һәм үгезләр асраганнар, каз үрчеткәннәр, бакча үстергәннәр. Һәм бар яклап бер-берсенә ярдәмләшеп торганнар.
Мәдинә Әбделхак кызы җырларга яраткан, ә Вилсур Мөхтәр улы гармунда уйнаган. Ә хуҗабикә пешергән вак бәлешләр һәм бәрәңгеле пәрәмәчләр нинди тәмле булган! Шундый гади генә гаилә шатлыкларыннан чын бәхет туган да.

Кызганычка, 2016 елның кышында Мәдинә Әбделхак кызы якты дөньядан киткән. Алар бергә 51 ел тату гомер иткән.
Вилсур Мөхтәр улы бүген дә тормыш иптәшен аерым бер наз белән искә ала. “Мәдинәм анда үзе генә булганга, мине көткәнгә менә инде ун ел тула”, - ди ул һәм сиздерми генә күз яшен сөртә.

Ул бүген дә эшсез тормаска тырыша. Җәен бакчасын карый, кышын “Кызыл таң” һәм “Авыл тормышы” гәзитләрен укый.
Кызлары Раушания һәм Рәйсә гаиләләре белән шушы ук авылда яши. Алар әтиләренең янына еш килеп йөриләр, аны хәстәрләре, яратулары, игътибарлары белән уратып торалар. Юбилярның дүрт оныгы һәм җиде туруны бар.
Вилсур Мөхтәр улына ныклы сәламәтлек, рух күтәренкелеге, якыннарының күңел җылысын һәм балалары, оныклары арасында бәхетле озын гомер кичерүен телибез!

Кантюковка авылы китапханәсе 
мәгълүматы буенча 
Е. ИШМӨХӘММӘТОВА әзерләде.