КӨЧЛЕ ХАТЫН-КЫЗ БАРЫН ДА БУЛДЫРА

Районыбыз үсешенә, аның бүгенгесенә һәм киләчәгенә зур өлеш керткән кешеләр арасында гомерләрен авыл хуҗалыгында эшләүгә багышлаган эшчәннәр аз түгел. Аларның тырышлыгы белән бүгенге көндә, игенчелек һәм терлекчелекнең арытаба үсеше өчен, районыбызның ныклы базасы, элегрәк эшләгәннәрнең һөнәри тәҗрибәсен үзләштергән лаеклы белгечләр бар. Шул эшчәннәр арасында көчле, хезмәт сөючән хатын-кызлар да аз түгел.

Сания Мәндән кызы Ишмөхәммәтова 1923 елның 10 гыйнварында Ишембай районы Улькар авылында дөньяга килә. үсмер чагы сугыш алды елларына туры килә. Ул дүрт класс тәмамлый һәм гаиләдә иң өлкән бала буларак хезмәт эшчәнлеген иртә башлый – известь-алебастр производствосында эшли.

1941 елның кышында 18 яшьлек Санияне һәм тагын өч кызны Ленинградтан ерак түгел Жихарево станциясенә мобилизациялиләр. Анда алар торф хәзерли, складлар саклый, көчле бомбага тотулардан соң мәрхүмнәрне җирләүче бригадаларына ярдәмләшәләр. Торфлыкта Сания Бөек Ватан сугышы ахырына кадәр эшли.

Тыныч тормышта Ишмөхәммәтова колхозда хезмәт сала. 1971 елда ул Стәрлетамак районына күченеп килә. Совхоз-техникумының дүртенче бүлекчәсе сөтчелек фермасында савучы була.

Сания Мәндән кызы үз эшен яратып, намуслы эшли. 1948 елда Ленин ордены белән бүләкләнә, 1978 елда – Октябрь Революциясе ордены белән, җиңел булмаган хезмәте өчен бик күп медальләр һәм мактау грамоталары ала.

Ишмөхәммәтова җаваплы һәм талантлы хезмәткәр була. Балалары, оныклары аны җылылык, ихтирам һәм ярату белән искә ала. “Ул изге күңелле, ярдәмчел иде, минем өчен һәм ике туганым өчен хәстәрлекле әни, ун оныгына яраткан картәни булды”, - дип сөйли кызы Фәнисә Галиева.

Авыл хатын-кызы... Ул эшчән дә, хуҗабикә дә, кул эше остасы да, һәм еш кына – күп балалы әни дә. Уйлап караганда, ничек өлгерә барына да. Йорт хуҗалыгында эшләрне башкарырга, балаларны, гаиләне хәстәрләргә, җиңел булмаган эшкә ашыгырга. Шулай авыл тормышында, авыр хезмәттә, гади булмаган шартларда ел артыннан ел ага да ага авыл көчле, изгелекле, тыйнак, сабыр хатын-кызының гомере.

2004 елның 14 августында С.М.Ишмөхәммәтованың йөрәге тибүдән туктый. Авыл хуҗалыгы производствосы алдынгысы, эшсөяр, җаваплы белгеч, җиңел булмаган авыл эшен белгән һәм ихтирам иткән лаеклы хезмәткәр. Ныклы рухлы, көчле ихтыярлы кеше. Сугыш еллары авырлыкларына һәм сынауларына, җиңел булмаган сугыштан соңгы елларга карамый, ул үзендә яхшылыкка ышаныч, бәхеткә һәм тынычлыкка өмет, тормышка, үз эшенә, гаиләсенә, туган җиренә карата мәхәббәт саклап кала ала.

Н.СТУКАЛОВА.