Изгелек һәм мәхәббәт дәресләре

21 сентябрьдә аны район ветераннар советы рәисе В.Ю.Зазулин, Бельский авылы ветераннар советы рәисе Й.Б.Морзабулатов, Бельский авылы мәктәбе директоры Э.Х.Харсева, укытучылар коллективы, укучылар котлады. Юбиляр адресына бик күп матур һәм җылы сүзләр яңгырады.

Ул “сугыш чоры балалары” буыныннан: балачагы авыр сугыш елларына һәм сугыштан соңгы чорга туры килгән, аңа намуслылык хисе, армый-талмый хезмәт кую гадәте хас. Сәвия Нургали кызының әтисе колхоз рәисе, фронтовик булган, әнисе гомере буена кырда эшләгән. Алар биш баласын намуслылык һәм җаваплылык рухында тәрбияләп үстергән.

Укытучы булу хыялы бала чагында ук барлыкка килгән. Алар яшәгән Бәләбәй районы совхозында дүрт еллык кына мәктәп булган. Укуын дәвам итәр өчен кызга көн саен күрше Мартыново авылына кадәр биш чакрым юл үтәргә туры килгән. 1957 елда ул Бәләбәй училищесына укырга кергән, аны тәмамлагач, Стәрлетамак районының Морак мәктәбенә эшкә җибәргәннәр. Биредә яшь белгеч рус теле укыта башлаган һәм булачак тормыш иптәше Рәшит Хәмит улы Бикбаевны очраткан. Алар ике ул тәрбияләп үстергән, бүген оныкларының һәм биш туруннарының уңышларына сөенеп яшиләр.

1975 елда Сәвия Нургали кызы Стәрлетамак балалар тәрбия колониясенә килгән, анда 30 ел рус теле һәм әдәбияты укытучысы булып эшләде. “Сез белем генә бирмәдегез, ә тормышка өйрәттегез. Яхшылыкка һәм мәхәббәткә ышанырга ярдәм иттегез”, - дип язган элеккеге тәрбияләнүчеләрнең берсе. Укытучы әлегә кадәр укучыларының хатларын саклый. Ул һәр үсмернең характерын, мавыгуларын һәм хыялларын белде. Ата-ана тәрбиясеннән мәхрүм калган укучыны, азат ителгәннән соң, үз фатирында сыендырды.

Аннары Сәвия Нургали кызы Бельский урта мәктәбендә эшләде: башта озайтылган көн группасында тәрбияче, аннары әдәбият укытучысы булды. Аның фатиры беркайчан да буш тормады – укучылар инша язарга өйрәнергә яки сөйләшеп утырырга килде. Хәзер юбиляр янына тимурчылар килә: клумба казый, су китерә, укулары турында сөйли.

Сәвия Бикбаева үсеп килүче буынны тәрбияләүгә багышланган күпьеллык хезмәте өчен “Хезмәт ветераны” ордены һәм күпсанлы Рәхмәт хатлары белән бүләкләнгән.

“Тормыш – чагу мизгел, тормыш – ул балалар, тормыш – ул ышаныч. Яхшылыкка, мәхәббәткә, иртәгәсе көнгә ышаныч!”- дигән девиз белән дәвам итә гомер юлын Сәвия Нургали кызы.

Л. МОРЗАБУЛАТОВА,

Бельский авылы мәктәбенең химия укытучысы.