БАТЫРЛЫК ҺӘМ КАҺАРМАНЛЫК ХӨРМӘТЕНӘ

23 февральдә иң әһәмиятле бәйрәмнәрнең берсе – Ватанны саклаучы көне билгеләнә. Бәйрәмгә багышланган тантаналы митинг Рощинский авылында хәтер стеласы янында узды. Чарада район Советы депутатлары, авыл биләмәләре хакимиятләре вәкилләре, район хуҗалыклары һәм предприятиеләре, шулай ук җәмәгать оешмалары һәм муниципалитет учреждениеләре җитәкчеләре, район активы катнашты.

Район Хакимияте башлыгы вазифаларын вакытлыча башкаручы Л.С.Шәйхетдинова килүчеләрне бәйрәм белән котлады һәм Ватанны саклаучы көне чын-чынлап халык бәйрәменә әверелүен билгеләде. Безгә, әлеге буын кешеләренә, бу дата хәрби намус, батырлык һәм каһарманлык символы булып тора.

Котлауларга Стәрлетамак шәһәре һәм Стәрлетамак районы хәрби комиссары Р.Г.Кантимиров, район ветераннар Советы рәисе Н.А.Миронов кушылды.

Ветераннар хәрәкәтен үстерүгә һәм патриотик тәрбия бирүгә зур өлеш керткәннәре өчен митингта районның кайбер мәктәпләренең тормыш иминлеге нигезләре укытучыларына һәм юнармеецларга Мактау грамоталары һәм Рәхмәт хатлары тапшырылды. Җыелганнар бер минутка тын калып Һәлак булган хәрби хезмәткәрләрне искә алдылар.

23 февраль көнне традицион батырлык тантаналары Стәрлетамак районының барлык авыл биләмәләрендә үтте. Яңа Отрадовка авылында тантаналы митинг Дан аллеясендә узды. Интернациональ хәрби бурычларын үтәгәндә һәлак булганнар истәлегенә куелган плиталар янына кызыл канәферләр салынды, ветераннар бер минутка тын калып аларны искә алды.

Бәйрәм “Юбилейный” паркында дәвам итте, Ватанны саклаучылар хөрмәтенә анда үзешчән сәнгатьтә катнашучыларның концерты булды, авылның иң актив кешеләре – патриотик юнәлештәге чараларда катнашучылар – Отрадовка авыл Советының Рәхмәт хатлары белән бүләкләнде. Солдат боткасы һәм кайнар чәй белән кыр кухнясы бәйрәм атмосферасына тагын да җылылык һәм ямь өстәде. Сугыш кораллары макетлары күргәзмәсе эшләде.

23 февраль бәйрәме районда киң билгеләнде. Һава торышы шартлары билгеләнгән чараларны тышта тулы күләмдә үткәрергә мөмкинлек бирмәде, алар мәдәният йортлары һәм клублар эченә күчте. Бу көнне Бөек Ватан сугышында катнашучыларны котладылар, бүгенге көндә безнең районда алар дүрт кеше генә калды. Аларга сәламәтлек һәм иминлек теләп азык-төлек җыелмалары тапшырылды.

Л.ИВАНОВА.

Ю.НЕСТЕРЕНКО фотосы.