Тукай - татар халкының бөек шагыйре

Авыл хәбәрчесе Светлана Гобәйдуллина бу уңайдан хатирәләре белән уртаклаша: “Мин кечкенә Айсылу Ибәтуллинаны исемә төшердем. Ул укытучысы Гайнуллина Минзифа Минияр кызының Тукайга багышланган дәресеннән соң өенә кайтып: “Әни, иң якын туганнарны гына җыеп, Габдулла Тукайның туган көнен үткәрик әле”, - дип үтенгән. Татар гаиләләре өчен бик шәп идея!

Мин зур кызыксыну белән Әхмәт Фәйзинең “Тукай” романын татар һәм рус телләрендә яңадан укып чыктым. Автор шагыйрьнең михнәтле, гыйбрәтле язмышын, юлында очраган мәрхәмәтле кешеләрнең аңа кечкенә “Апуш”тан зуп-зур Тукайга әйләнергә ярдәм иткәннәрен йөрәккә үтеп керерлек итеп тасвирлый”.

Стәрлетамак районы татарлары музеен оештыручылар  исеменнән Светлана Гобәйдуллина “Авыл тормышы” гәзитен укучыларга, бигрәк тә татар теле укытучыларына һәм аларның укучыларына, яңа уку елына бүләк итеп, викторина тәкъдим итә.

Сорауларга җаваплар табар өчен, катнашучыларга “Тукай” романын укып чыгарга, шагыйрьнең иҗади мирасына ешрак игътибар итәргә, тәрбияви эштә татар халкы гимны – “Туган тел”не кулланырга тәкъдим ителә.

Дөрес җавапларны тизрәк җибәрүчеләрне авыл хәбәрчесеннән бүләк көтә. Сорауларга җаваплар һәм җиңүчеләрнең исемнәре алдагы саннарның берсендә бастырылачак. 

Викторина

1. Әхмәт Фәйзинең “Тукай” романының эпиграфы.
2. Габдулла Тукай кайсы авылда туган, аның гаиләсе турында ниләр беләсез?
3. Габдулланың әнисе ягыннан картәтисенең исеме ничек? Ул кайда яшәгән, гаилә хәле нинди булган?
4. Казанның Яңа бистәсендә Габдулла кемнәрдә уллыкта булган? Һөнәрләре нинди?
5. Фәкыйрь балаларны укытып, “күңел күзләрен ачарга” тырышып, “татарны агартыйм” дип, “үзе каралып беткән” хәлфәнең исеме ничек? Ул Габдуллага нәрсә бүләк иткән?
6. Габдулла беренче сабакны кайда алган һәм аның хәрефләрдән беренче сүз төзүенә нинди вакыйга сәбәп булган?
7. Нинди сәләтләре белән Габдулла Кырлайда дан алган?
8. Кем һәм ни сәбәпле Габдулланы Кырлайдан алып киткән һәм аны Җаекка ничек озаткан?
9. Шәпеш хәлфәне Габдулла ни өчен өнәмәгән?
10. Габдулланың рус телендә укыган беренче китабы? Аңа аны кем биргән?
11. Габдулла Тукайның “Мужик йокысы” шигыре кайсы рус шагыйренең йогынтысында туган?
12. Нинди вакыйгадан соң Габдулла мәдрәсәдә яшәп укый башлаган? Ул нинди хис-тойгылар кичергән?
13. Габдулла беренче тапкыр кемгә гашыйк булган? Аларны ничек аерганнар?
14. “Бәхетле Мәрьям” романын Габдулла Тукай ни өчен үз исеме белән чыгарырга каршы була? Аның хезмәте ничек бәяләнә?
15. Габдулла Тукайның алтынчы буынга кадәр шәҗәрәсе.

 Җавапларны Стәрлетамак шәһәре, Комсомол урамы, 82 адресы буенча “Сельские нивы” – “Авыл тормышы” гәзите редакциясенә яки электрон почтага (rekselniv@yandex.ru) җибәрергә.

С. ГОБӘЙДУЛЛИНА,

авыл хәбәрчесе.